「各位好，我係阿森，我背住老婆喺出面搞女人，我係賤男。」邊個賤男背妻偷食，仲喺自己twitter度認埋咁衰格？原來係畀人大報復。英乙球會哈特普爾嘅U21教練森哥連斯（圖左），因為喺周二向佢老婆克拉（圖右）招供認有外遇，克拉嬲到爆炸就搶咗哥連斯部手機，代佢喺twitter發文認出去滾（下圖）。哥連斯個twitter有近2,000人關注，𠵱家全世界都知佢做過衰嘢，不過佢個戶口之後冇耐就刪除咗。