上任議員剛好一星期嘅公民黨楊岳橋，近日忙到氣咳，除咗頻頻落區謝票，亦要一朝早就不停接受各大傳媒訪問。岳少（圖）噚日出席泛民下午三點半召開嘅記招時，更連午餐都要分開兩次食，記招前將麥記新款脆脆黑椒漢堡交畀助手「保管」，一粒鐘記招完咗後先攞番嚟食埋佢。岳少會後話，因為貪新鮮，所以想試吓新嘢，再一邊食一邊苦笑話：「𠵱家真係好多會要開呀」。
除咗食包，向來注重打扮好鬼姿整嘅岳少，左手食指上嘅銀戒亦相當搶鏡，更引起黨友Miss Mo毛孟靜嘅好奇心，會後猛問岳少：「你有女朋友未嘅箒？」竟然講呢啲？難怪有女友嘅岳少聽罷笑一笑。