一位講普通話比左丁山好得多嘅老外朋友在周末行山，由西半山行上山頂，再落香港仔，佢話香港山色海景，甚為吸引，由石屎森林市區行入野草叢林，只需四十分鐘，再行一小時又可到達高樓大廈，享受繁盛都市之樂，係在北美洲難得一遇嘅。
佢沿途拍照，竟然留意到山區之內，兩塊大小巖石叠在一起，小石在上，大石在下；有人在小石上用紅油寫上CY，再在大石上寫出「下台」，打直嚟睇，就係「CY下台」，老外開咗手機，俾張相片左丁山望吓，跟住問一句：「CY係唔係世界上最不受歡迎嘅領導人」？
居然有人行山而帶埋一罐紅油上山「塗鴉」，不是寫「某某某到此一遊」，而是寫「CY下台」，都真係幾唔怕麻煩。左丁山如此答老外：「CY不受歡迎，係肯定嘅嘞，至於是否世界上最不受歡迎，就好難講，台灣馬英九嘅民望可能低過梁振英㖭。」哈，老外曾在台灣讀國語初階，又曾駐北京做公司代表，深造普通話，對兩岸都有認識，佢話：「台灣係本省人排斥外省人啫，台灣本土意識極濃厚，但香港領導人係香港出世，土生土長嘅噃，點解與馬英九同病相憐？」
講起來就匹布咁長，不講也罷。發生旺角事件之後，各方分析本土勇武派梁天琦點解在新界東有6萬6千票，而選票多數來自北區公屋較低收入嘅青年？如果同類型選民全港投票，梁天琦咪可能（計死數）在全港五個選區攞到近30萬票，呢個數字幾令政府震驚啫。中國共產黨最初起家係在城市，以烏托邦、平等均富、打倒特權之思想吸引20零歲嘅學生青年反對蔣介石，點知到當今香港，偏偏就係無產階級青年支持本土勇武派反對特區政府，反對梁振英，與中國共產黨站在對立面，實在係非常諷刺。張德江在北京對香港人大代表講話，提及青年工作，就話青年要全面客觀了解中國，包括認識共產黨的歷史，呼籲要和青年、社會精英講一講。俞正聲又話香港要做好青年工作。講就易嘞，梁振英回港後，都唔知點樣做？叫劉江華做？佢去到香島培僑都未必受歡迎，叫吳克儉做？吳局長大概對共產黨史不甚了了！如何開班吸引公屋青年聽中共黨史，可能難過興建高鐵。能在此問題為梁特首解困者，值得起碼一個金紫荊勳銜！