零售市道與商場租務差，已經唔係新聞，行內人亦面對現實，想盡方法吸客。好似嘉里建設（683）旗下Megabox，噚日就搵來幾對拖友扮結婚，搞咗個冰上模擬婚禮做推廣。
Megabox總監文靜芝更粉墨登場，落足心機打扮。佢身穿紅色晚裝，個頭set到好行，戴埋一條閃到爆嘅頸鏈，加埋粉紅毛毛披肩，佢企埋幾對「新人」旁邊，十足十親家奶奶。
佢咁樣企喺溜冰場成個鐘，都話「一啲都唔凍」，認真敬業！佢仲好識賣花讚花香，單係短短10分鐘嘅開場白，已經提咗好多次「商場配套一流」。
翻查資料，文靜芝入嘉里前，曾經喺百利保（617）賣樓，又喺信置（083）做過零售租務，又去過合和（054）同中環ifc做寫字樓租務，經驗豐富，難怪佢咁識講嘢喇！