早排中紀委派人入主港澳辦，話明港、澳兩地嘅中聯辦都係調查目標，仲有傳聞話新官舊官一齊查，曾做過香港中聯辦副主任、𠵱家係澳門中聯辦主任嘅李剛（圖），又咁啱喺呢個時候缺席兩會，自然引起好多猜測，噚日就有現任同前任澳門中聯辦官員，為李剛失場降溫。
噚日朝早出席澳門人大分組討論嘅澳門中聯辦副主任陳斯喜話，李剛只係身體有啲唔舒服，醫生要求佢請假，但病情唔太嚴重，不過就冇話李剛喺兩會閉幕前，有冇機會到北京開會。而同樣喺北京開會嘅澳門中聯辦前主任白志健則指，中央派中紀委入主港澳系統只係完善機制，中聯辦冇乜權力，亦不分管錢財，似乎暗示中聯辦冇乜好查噃。