公民黨將於本月18日喺九龍灣展貿某酒家舉行10周年籌款晚宴，當晚重頭戲係公開競投環節，據聞有唔少珍藏，包括由柯華捐贈嘅林逸之畫作《竹鄉佳話》（149.5cm高、68.3cm闊）。
現代書畫家林逸之係著名已故書畫家陳大羽教授嘅入室弟子，而陳大羽教授則係齊白石入室弟子；林逸之亦學詩文及書法於著名已故學者及書法家高二適先生，拍品極具收藏價值。
向來都有學書法、寫得一手好字嘅余若薇，都會捐出書畫作品《海闊天空》（圖），「原諒我這一生不羈放縱愛自由」，相信講中唔少港人心聲。
當晚亦有書面競投環節（Silent Auction），價高者可獲余若薇及楊岳橋即場為《香港人》記事簿題字。據知楊岳橋更會再次上陣，席間重演新東立會補選辯論。