中國女足攞咗今夏里約熱內盧奧運入場券，兼獲中國足協贈送「We Are Back！」嘅致敬海報，威過班男人多多聲，周四返京時仲有熱情粉絲去接機。；陣中嘅上海靚女門將、身高有成1米87嘅趙麗娜（圖）仲爆紅，做咗萬人迷。趙麗娜喺郝偉時代畀人笑係花瓶，全靠生得靚先入選，不過佢喺法國籍教頭布魯諾上任後得到重用，仲用行動嚟證明自己有樣之餘亦有實力，喺對上11場正選上陣嘅比賽之中，只係失咗六球，六場冇失波，每場平均失波只有0.55球。
另外，喺倫奧攞到銀牌嘅日本女足，張里奧入場券輸咗畀中國女足後，佢哋教練佐佐木則夫亦正式辭職，但小道消息話，佐佐木其實係俾日本足總炒魷，話晒佢幫日女贏過女子世盃冠軍，家陣畀佢辭職係等佢可以好啲落台。
