這晚谷草夜賽輕磅大冧巴馬威震上半場，頭兩場分別由12號「盈喜悅」及11號「紅褲精神」後上勝出。到了第三場四班1200米，隸屬徐廐的11號「駿瑪」於11檔起步，夥拍見習生黃皓楠前置守好位，末段超越放頭馬後就此直領到底，力拒外欄一眾追兵來犯，勁爆114倍巨冷Win開齋，是今季谷草最冷頭馬；組合獨贏A3派64元正，頭馬時間則為1分11秒1，此駒今次贏馬統統同11呢個冧巴有關。
「駿瑪」出自香港拍賣會，身價400萬，之前七戰零獎金，每次出賽都係99倍大冷門，從無走勢，今仗換黃皓楠減七磅，結果造就徐雨石、黃皓楠師徒繼剛周日贏「故事」後，連續第二次賽事攜手建功。
今場唔好彩的是賀賢同潘頓呢對澳洲鄉里，兩人合作1.8倍大熱門「紀利福星」姍姍來遲影相飲恨做二奶，此駒一連兩場屈居亞軍，賀賢延續自1月17日「三和福將」後的不勝困局。今場第三名係「新疆紡」，「靚先生」虎頭蛇尾只得第四，四重彩派19萬6千幾。
徐雨石指「駿瑪」今仗贏馬是驚喜，他給皓楠的策騎指示乃不要在馬群中受困，把心一橫擺前走，估不到成功取勝，非常意外。