上星期五香港花生價格一度急升，事關代表永恆嘅亞視，曾經傳出會關台播雪花，結果強國資金嘅新老闆賭神式拎一篋金牛同一張支票出嚟，喺本報即時新聞，以及其他網台都搞直播下，六點鐘大限安然度過，亞視結果都係冇死到。
要批評亞視好易，但讚亞視好難，其實作為香港球迷應該更加珍惜亞視，唔係取笑佢哋幫岩布仙尼慶祝自己生日，8、90年代佢哋都投放好多資源去播世界頂級足球賽；國際足協仲未瘋狂cap水時期，90世界盃香港係由免費電視台直播，亞視為咗搶收視，決定唔喺直播期間去廣告，或者對𠵱家香港球迷嚟講好似係應份，但當時真係破天荒；結果另一大台喺廣告期間真係出現入球，接到好多投訴先死死地氣跟亞視唔插廣告。亞視仲搵黃霑做執波仔主持人，阿叔、尹志強講波，雖然佢哋都離開咗我哋，但呢個真係堪稱黃金組合，仲有直播英格蘭足總盃，都係小弟認識英格蘭足球嘅開始。
阿士東維拉（黃衫）喺香港討論區被笑稱英超亞視，因為佢哋積弱甚久，但往往護級戰大難不死，由92年成為英超創會球會之一，到今時今日仲保住未嘗降班呢個金漆招牌。講真佢哋同亞視都真係幾似，8、90年代都有光輝歷史，81年拎到當時英格蘭最高級別嘅英甲冠軍，82年歐冠盃更加擊敗拜仁捧盃㖭，到首屆英超都只係僅次於曼聯拎亞軍。過去維拉都有唔少好球員，約基、占士米拿、賓迪基，都成為強隊獵物，實力更加每下愈況。今季長居榜尾，下周日對爭標嘅熱刺亦都九死一生，回天乏術，𠵱家只係睇佢哋宣佈降班，定係亞視播雪花先。
文：牽牛