里約熱內盧奧運嘅亞洲區外圍賽最後一輪，中國女足噚日喺領先大半場嘅情況之下，末段被澳洲女足追平1:1。賽前中國同澳洲都已經穩奪頭兩名嘅出線資格，所以中國都輪換咗部份主力，派出咗前鋒馬曉旭（9號）等幾名新力軍上陣。17分鐘，馬曉旭就建奇功，接應劉杉杉嘅傳中，把握到對方後防頂空氣嘅失誤，幫中國開紀錄。如果維持1:0贏波到尾，中國就可以反超前澳洲，攞埋小組首名，但可惜守到比賽末段，俾澳洲中場艾蒙特喺禁區頂嘅炮彈式射門，追成1:1完場。結果澳洲以13分首名出線，而中國就以三勝兩和得11分晉身奧運。