周麗淇（Niki）半年前與內地小生徐正曦發展姊弟戀，因聚少離多而導致分手收場。36歲再次回復單身，這位黃金盛女在情場上失意，但事業卻春風得意，轉戰內地拍劇的她，最近獲得內地首個獎項，人氣極盛。愛情呢？Niki就享受單身的自由，順其自然，耐心等待Mr. Right。
撰文：顏英儀
造型：林嘉慈
攝影：郭賢興
化妝：Navi Lam
髮型：Ziggie Lo of La Mod Salon
服裝提供：Lane Crawford
轉攻內地拍電視劇的周麗淇，兩年多已拍了4套劇，成功躋身內地搵人仔兼賺人氣，日前就憑內地劇《臥底》而獲得江蘇電視「最具人氣女演員獎」。劇中她飾演一名女護士，被內地網民稱為「最美的女護士」，劇照更在網上瘋傳，Niki說：「第一次喺國內攞獎又驚又喜，開心得內地觀眾支持同行內人嘅認同，希望再拍多啲好戲；都有傾緊香港嘅劇集，拍咗咁多年唔想重複以前做過嘅角色，有好劇本都會考慮，不過最希望今年可以拍一套電影，同自己鍾意嘅導演合作。」
享受單身自由
近年於國內發展的Niki，2013與內地小生徐正曦拍《衛子夫》而相戀，可惜兩人因長期分隔異地，上年年中分手，Niki回復單身，「單身幾好啊，可以全心全意做自己嘅事，屋企都又冇畀壓力我，如果有拖拍要顧埋另一半，𠵱家事業、朋友、家庭全部自己時間，愛情要順其自然，我都唔知幾時可以遇到Mr. Right，靜待佢嘅出現。」介意被叫「黃金盛女」嗎？她說：「我冇留意呢啲潮語，最緊要自己開心，唔在意別人嘅眼光，唔可以人哋講吓我就求其搵一個人嫁咗就算㗎嘛。」
理想男友套餐
港女拍拖講條件、講package，Niki未來男友package又是甚麼？她說：「喺我字典裏面冇理想情人，如果講得出長髮、高矮、肥瘦就唔係愛情，你要只係一樣嘢，感情好虛無，見到一個人講唔出嘅感覺嗰種先叫做愛情，講得出來嘅就係條件，就好似買賣咁，唔係愛情，幾時出現未知，要click到先有用，有冇錢並唔係我擇偶條件，識我嘅人都知，我過往嘅男朋友都冇錢，我意思即是話佢哋唔係啲乜嘢富豪，都係白手興家，我唔需要私人飛機或者幾十塊地，可以維持基本生活都OK。」
這個年代的女人都主動爭取自己的幸福，但Niki抗拒主動出擊，「我就唔會，如果係就會有好多走馬花燈，我骨子裏好傳統㗎，女仔要保持少少矜持，如果感覺到對方想追我，我都會畀機會對方，希望將來結婚可以相夫教子，但我唔會只係做煮飯婆，唔想同社會脫節。」
陪父母盡孝道
Niki五年前與友人投資百萬經營髮型美容生意，做老闆娘，算是圈中的小富婆，「做生意同拍戲好唔同，呢幾年都學咗好多，人都長大咗，生意託賴都幾好，下一步想喺內地發展，其實我覺得自己都幾幸運，咁多年嚟，朋友、觀眾同記者都對我好好，只要我用心去做，就會做好件事，未來我想試吓做珠寶首飾及唔同方面嘅生意。」
入行15年，Niki名利雙收，近年主攻內地，見家人的時間少之又少，因此今年計劃要做個孝順女，「人生除咗搵錢之外，都希望可以抽多啲時間陪屋企人，之前成日掛住做嘢，我覺得錢冇話搵夠，每個人定義唔同，我暫時達到我嘅目標，都拼搏咗咁多年，見到爸爸媽媽年紀開始大，想陪佢哋去吓旅行，唔想將來有遺憾或者後悔。」
白滑小秘密
女人25歲後，皮膚就開始衰老，不過36歲的Niki皮膚就keep得好白滑，「可能係上海人，都要keep㗎，可能生活冇乜壞習慣，唔煙唔酒，又唔飲凍嘅嘢，飲食清淡，對皮膚都好啲，逢初一、十五都食齋，我最差都係食無定時，𠵱家開始都注重養生，都會研究吓食療，睇吓咩補品啱自己。」