微軟創辦人蓋茨（Bill Gates）今年蟬聯全球首富，不過原來呢位全世界最富有嘅人，唔多鍾意shopping，好少為自己買衫或飾物，如果買嘢，都係買好東西畀太太梅琳達（Melinda Gates）。嘩，梅琳達實冧晒喇。
蓋茨日前參加社交網Reddit「任你問」（Ask Me Anything）環節，喺一粒鐘內，答晒網民所有提問。
蓋茨除咗表示佢鍾意買好東西畀太太之外，亦承認娶梅琳達係佢一生之中最正確嘅決定。佢解釋，雖然投身軟件工作都係一個正確決定，但呢件事係好自然咁發生喺自己身上，唔算一個選擇。
Reddit「任你問」環節一直深受名人歡迎，蓋茨已經係第4次參加。網民亦問到有關人工智能監管、蘋果解密爭議等問題，十分有趣。