去曼谷旅行，必逛商場，左丁山去得比較次數多嘅，有遊客必到嘅Siam Paragon、Emporium、Terminal 21及為咗食嘢而去嘅Central Chitlom，Siam嘅Food Court大到無倫，行到腳軟，Central嘅夠現代化，成為成間百貨公司嘅焦點之一，好多人專登去Central，順便買吓嘢，就係為咗在頂樓food court食餐而已。
記得好多年前，金鐘太古商場亦有一個小規模food court，位於地下，內有麥當勞、KFC等，不少當今40歲左右嘅夫婦，拍拖時就好多拖友約在PP麥記等人。後來PP為咗增加租金收入，將小food court清理咗，以後再冇麥記，成個商場好似靜咗不少。
打電話搵唔到專家L，但遇着餐飲老闆F，問佢點解香港商場缺乏一級food court。佢話：「鬼咩，租金貴吖嘛，PP梗係想賣手袋多過賣漢堡包啦。其實新加坡方面有研究，好嘅food court可以為商場帶來家庭式人流，為商場增加人氣，帶來氣氛，例如依家PP好高級、好乾淨，在入面行，好舒服寧靜，但我地普通香港人無嘢買呢，樣樣都咁貴，我地買得幾多次呀，一旦高消費遊客少啲，租客都叫苦呀。」問佢點解曼谷一啲商場又可兼容平價food court？餐飲F話：「管理得乾淨企理，並不容易，呢方面新加坡叻過我地，新加坡有一間叫做Food Republic嘅公司，專門經營food court，向靚商場包起food court嚟做。大角嘴奧海城、油塘大本營有food court，相當好，就係Food Republic搞嘅。」
原來商場內大排檔並非散兵游勇，亦係由專家策劃管理嘅。香港弊在租金太貴，商場隨時可以趕走20幾年歷史嘅租戶（如Dan Ryan's），做飲食業確係不易。3月4日，華爾街日報有篇專文講「泰國，亞洲美食皇者」，指最近調查結果，亞洲最佳五十家餐廳，曼谷Gaggan名列第一，Nahm名列第十，令人矚目，國際食評界一致認為曼谷會成為亞洲美食之都，原因有三個：（一）開辦成本低，租金平，（二）工人易請，薪水不高，（三）農產品，食材產品豐富，可就地取材。就因為咁，不少年青外國廚師勇於前往曼谷創業，Gaggan就係由印度廚師在2007年開創嘅。左丁山因為唔食得辣，去曼谷始終冇去印度人主理嘅Gaggan，可能係走晒寶！