早前突然盛傳周秀娜戀上已婚嘅超級富二代，令佢「脫貧」。本報追問娜姐回應時，佢當時係話有人追，不過就抗拒已婚人士。但隔咗幾日佢同鄭伊健出活動嗰陣，就突然改晒口風話:「根本冇呢個人存在!」
點解反應差咁遠呢?昨日就有報道指呢段「富二代戀情」係娜姐自製嘅，無非係想谷新戲，結果搞出大頭佛。報道仲話娜姐本來諗住搞個「富豪戀」可以自抬身價，甚至早喺一年前已經「準備」，向身邊人放風自己同富豪關係密切，令傳聞喺闊太圈傳得好「恆」，上晒報紙雜誌頭條後，報道話超級富豪不甘被人利用，準備向周秀娜採取法律行動。而娜姐近日收到風驚驚豬，所以日前出活動，咪突然改口風話「根本冇呢個人存在」囉。