福建西裝股虎都（2399）年僅26歲嘅太子爺郭漢鋒，半年多前接替爸爸郭建新，成為公司行政總裁。後生可畏，華華噚日同佢傾偈，除咗談吐有禮，原來佢都幾多諗頭，例如佢話將來如果推出童裝，就要搵兩個寶貝仔做模特兒。
郭漢鋒兩個仔𠵱家分別2歲同3歲，佢話，平時工作好忙，放工仲要陪仔玩，佢笑住話：「佢哋都幾百厭㗎！」所以湊仔呢個重任都係交畀太太作主，佢閒時先會帶佢哋返公司玩。
佢又話，兩個小朋友仲細，暫時都會留喺內地讀書，將來先安排來港讀小學。
可能佢日日望住兩個仔，發現童裝生意應該大有市場，所以佢就諗緊有冇可能發展埋童裝業務，如果事成，佢就打算搵兩個仔做代言人，乘機可以幫佢哋搵埋女朋友仔咁話。呢位爸爸認真鬼馬。