C朗又刷數據嘞！周二歐聯16強次回合，皇家馬德里就算已經有兩球優勢，仍然主場憑基斯坦奴朗拿度（C朗）貢獻一入球一助攻，以2:0再挫羅馬，總成績4:0晉級；C朗入埋呢球今季已經累積40球，連續六季單季入40球以上（見附表），歐聯累積入90球繼續刷新數據，數據王真係捨佢其誰。
首回合輸兩球，羅馬呢場就算作客都急攻，其實上半場都有唔少領先機會，但穆罕默德沙拿同迪斯高都失機；C朗叫得做數據王，下半場就終於發威，64分鐘接應盧卡斯華斯基斯右路傳中近門射入，幫主隊先開紀錄，佢又唔係獨食得晒，四分鐘後就助攻畀占士洛迪古斯窄位射入，繼首回合後再以2:0勝出，施丹首度主場領軍出戰歐聯淘汰賽，就帶皇馬入八強。
歐聯累計轟90球
周二入多一粒之後，C朗今屆歐聯已經累積13球，拋離次席嘅拜仁前鋒羅拔利雲度夫斯基六球，再拎神射手呼聲真係高，而且已經累積90個歐聯入球，繼續喺歐聯累積入球榜領放。連埋今季西甲入嘅27球，加埋已經入咗40球，連續六季總入球有四字頭或以上。不過唔知係唔係主場球迷睇C朗入波睇到悶，今場C朗竟然都俾人噓，施丹賽後就話：「球迷嘅噓聲對C朗就係一種動力，C朗結果都可以入波，幫球隊獲勝，不過我希望球迷同球員可以團結一致。」講開數據，皇馬門將基羅拿華斯已經跨季八場720分鐘冇失波，只要八強首回合兼次回合上半場不失，就可以挑戰前阿仙奴門將列文嘅853分鐘不失波紀錄。
C朗被噓爆 王子獲掌聲
唔知皇馬球迷係唔係手指拗出唔拗入，C朗被噓，相反羅馬「王子」托迪就獲得掌聲。39歲嘅托迪74分鐘入替艾沙拉維，皇馬球迷向佢報以熱烈掌聲，唔知仲以為羅馬主場㖭，有傳托迪今季完結後就可能被逼走人，今場亦都好大可能係佢最後一場歐聯，完場後就同皇馬另一位10號仔占士洛迪古斯握手慰問一番，皇馬後衞沙治奧拉莫斯就醒水，同托迪交換波衫，仲話細細個已經好欣賞佢㖭。