中證監新主席劉士余上任不足一個月，內地股民似乎對佢好大期望，先幫佢改個花名「牛市雨」，希望牛市重臨。日前佢仲叫大家買股，唔好沽，可惜A股唔聽話呢。
前日劉士余參與港區人大代表團小組會議，佢面對鏡頭表現精靈，被問到中港股市，就講明「兩地交易日不能講股市」，只祝中港股市發財。
不過，有份同佢開會嘅港區人大代表陳勇爆料，指劉士余提過「希望大家都要買股票，不要賣股票」，消息噚日一出，A股就結束6連升，「牛市雨」暫時失靈。
54歲嘅劉士余，2014年底開始出任農行（1288）董事長，最近接替肖鋼任中證監主席，佢喺農行時作風低調，鮮有金句，點知今次烏鴉口，叫人買股就嚇親個市，可能令佢了解到「沉默是金」嘅道理。