嚟到季尾，除咗講爭標形勢，當然要留意吓護級啦。牽牛兄可能好鍾意亞視啦，所以食晒字，想講吓阿士東維拉。咁小弟就延續上星期嘅話題，講有錢唔係大晒，因為有隊波叫紐卡素，證明咗使勁多錢都可以踢到好垃圾。
計晒夏天同冬天轉會窗，紐卡素今季使咗超過8,000萬鎊（約8.8億港元），喺今季轉會支出排行榜上排第八，高過車路士、皇家馬德里、拜仁慕尼黑，排喺利物浦同巴黎聖日耳門下面。紐記今季有五宗過千萬鎊收購，五宗都係買中前場球員，諗住加強攻力，但紐記今季聯賽入得28個波，攻力排英超尾二，只係多過隊「亞視東維拉」。
嗰五大收購入面，小弟覺得韋拿杜姆（右）同舒維爾都可以，但泰奧雲踢咗半季就已經返咗去馬賽。阿歷山大米祖域呢位遊戲中嘅妖人，現實不外如是。至於季中簽番嚟嘅安祖斯唐辛都算係典型嘅英格蘭新星，何謂典型英格蘭新星？踢咗一兩場好波，就被英國傳媒讚到天上有、地下無，身價高到得人驚，但名不符實程度亦係嚇親人。除咗吸大位遠射之外，唐辛就唔識做其他嘢，所以佢喺熱刺被打入冷宮都好正常，係估唔到有隊唔正常嘅紐卡素願意拎成1,200萬鎊嚟買起佢。使咁多錢買水貨，紐卡素係要為自己嘅愚蠢找數。
西甲嘅華倫西亞都類似，今季使咗超過一億鎊，開支排行榜排到全球第四位！華倫雖然冇紐記咁大劑，但霸氣盡失，淪落到成隊AC米蘭咁，真係幾欷歔。對唔住，用錯比喻，AC係因為班主唔使錢先搞成咁，而華倫嘅林榮福係使完錢仲差咗。其實，華倫同紐卡素仲有一個共通點，同樣有個英格蘭主帥。
文：咖喱