剛周日女將蔣嘉琦，第一次騎洪金寶隻一班馬「崇山寶」，雖然輸咗只得季軍，但嘉琦差啲K.O.兩大高手潘頓、莫雷拉，可以話贏盡口碑。
同樣亦於剛周日，嘉琦策騎「幸運年年」大勝對手，捧走評馬同業協進會盃，係佢第一次贏得錦標賽。
今期(9日)夜馬賽事，嘉琦又有另一個第一次，就係第一次喺快活谷出賽。呢條跑道出咗名彎急路窄，都幾危險，究竟嘉琦準備好未？
「我會留意彎位同直路方面，咁當然我一定會好期待啦！我會做多啲功課，思考臨場應該要點發揮。」嘉琦說。
其實嘉琦都幾冇運，今次佢兩匹座騎「大運舞台」、「精算率然」都排最外之12檔起步，估計蝕位都蝕都暈。
聽聽已掛靴嘅嘉琦師姐江碧蕙有乜意見？
江碧蕙說：「我覺得喺快活谷最高難度，就係所有彎都好急，如果排外檔搶位要好小心，好容易阻到內檔馬。而對面直路有段落山，嗰段唔好用晒隻馬，要用心留放。」
江碧蕙續說：「我相信嘉琦喺快活谷都有足夠試閘經驗，都知道應點留放同明白跑道特性，我對嘉琦有信心，佢應該應付到冇問題。」