小朋友學琴考學校是常識吧，但有多少父母敢讓子女以音樂作為終身事業？30歲的鄺展維在公屋長大，在自由環境下，讀音樂由學士讀到博士，由香港讀到英國，如今以音樂創作為事業，本周日將以創作和故事逗一家大細開心。對於做音樂「搵唔到食」這個老問題，鄺展維說：「阿媽話，總之我第時做個好人就得。」
記者 姚國雄
「英華仔」鄺展維說，他讀音樂的背景，脫離一般人的想像。他在翠屏邨的單親家庭長大，媽媽不懂音樂，「阿媽係聽鄭少秋」，他小學五年班首次接觸單簧管，16歲學鋼琴，「我細個時係喺碌架床用discman聽古典音樂」。自言在「一生一體藝」口號下成長，結果一生與音樂結緣。
中大音樂系畢業、拿獎學金赴笈英國完成作曲碩士及博士學位，如今是個以現代古典音樂謀生的作曲家：「其實靠創作謀生，喺邊一行都係困難...學校、前輩都話，做作曲可能要求人哋演出你嘅作品。」2014年，29歲的他獲香港小交響樂團垂青，委託創作一首開場曲，讓他靠自己作品帶來首筆可觀收入。
鄺展維說，母親從不介意他讀音樂或「搵唔到食」：「我好感激佢，亦好佩服佢，雖然佢唔知我學啲乜，但又肯攞錢比我學...從來無畀說話我聽、冇話呢啲嘢搵唔到食、不如正正經經做嘢呢類說話。」鄺展維當年選科，問媽媽要否他讀會計求個穩陣：「阿媽話，『你唔鍾意讀，我迫你讀都冇意思，總之第時做個好人就得』，對於我嚟講，係一個好大支持。」
教過不少學生，鄺展維知道誰是自願、誰是被迫來以音樂作為升小、升中的工具，「我相信學生無興趣，你迫佢到學到幾叻，佢最後都係會放棄，好多人考咗個八級（鋼琴），差唔多誓神劈願話以後都唔彈琴，可能佢哋仲衰過唔學，連對古典音樂興趣都無埋，聽到莫扎特、貝多芬嘅音樂，就諗起以前學琴嘅痛苦經歷。」
鄺展維近月聯合「香港創樂團」及著名講故佬「雄仔叔叔」，來一個現場音樂加講故事的crossover新嘗試，趁本周日的西九自由約免費公演最後一場音樂與故事的創作。五位樂手演譯鄺展維為「雄仔叔叔」故事度身創作的音樂，讓大小朋友聽一場有關未來、由憂患到希望的故事。演出日期為本周日下午3時15分，地點在西九文化區苗圃公園，演出時間為半小時至45分鐘。