周二英足盃16強重賽，阿仙奴作客半力出擊嘅英冠球隊侯城以4:0大勝晉級，不過代價認真大，一場波又傷多三件。
阿仙奴𠵱家喺英超落後榜首李城八分，後面第四位嘅曼城又越追越近；另一邊廂歐聯就吊緊鹽水。賽前連續五場波贏唔到，班廠迷相當之唔高興，喺場上拉橫額希望領隊雲格係時候講拜拜（下圖）。兵工廠作客侯城場波，藉基奧特同埋禾確特各入兩球以4:0大勝，不過一對中堅梅迪薩卡同基比爾包列斯達先後受傷退下火線，點知入替嘅艾朗藍斯踢咗十幾分鐘都傷埋。雲格賽後話三個傷兵裏面，以拉傷大腿嘅藍斯最嚴重。
阿仙奴喺英足盃晉級之後，周末馬上又要踢八強，主場對屈福特。賽會安排佢哋喺周日先踢，之後周三就要踢歐聯作客巴塞隆拿，傷兵多賽程密，可能班廠迷寧願佢哋喺英足盃出局好過。
