個個黨都力谷年輕人走到幕前迎合世代訴求，湯家驊噚日介紹佢嘅年輕六大門徒畀傳媒認識（圖），話想透過年輕人喺各區「收橋」，再向政府提交建議。佢哋至今已同食衞局局長高永文、運房局局長張炳良、環境局副局長陸恭蕙見面。
湯狀六門徒都係高學歷年輕人，至少五人都擁有碩士學歷，較為人熟悉嘅係青年論政組織三十會理事劉培榮。其餘五位包括凝聚香港體育基金創辦人黃梓謙、民主思路總幹事袁彌昌、民主思路高級研究員忻浚賢、前港大學生會會長麥嘉晉、法巴亞太區總部精益管理部項目顧問經理馮潔鳴（Veronica）。當中以2009年科大工商管理系畢業嘅唯一女將Veronica最受注目，皆因喺銀行界工作嘅佢出名省鏡，可惜佢話暫未有從政打算，少男可能會失望咯。
八方奇怪，不時參加民主思路活動嘅大律師林作竟然冇現身，原來林作只係民主思路嘅同行者，仲未係成員。問到鄉事派侯志強即將成立「新進步聯盟黨」，豪情壯語話誓奪新界東兩席，湯狀反問：「新進步聯盟（黨）係乜嘢嚟？」