噚日係「三八婦女節」，家陣唔少女性都係商界女強人，而且身兼多職，好似創興銀行（1111）副主席梁高美懿（圖）咁，另外身兼5間上市公司嘅獨董，包括建設銀行（939）及新地（016）等，要講坐最多間本港上市公司嘅女董事，應該係數一數二。
梁高美懿曾經喺訪問中提過，一間企業應該至少有一半女性董事，不過非牟利機構「社商賢匯」噚日發表嘅調查發現，過去一年，本港藍籌企業女性董事比例只得11%，同前年比較係「零增長」囉！
社商賢匯行政總裁余雪奕認為，董事會人選多元化，對企業而言係好事嚟嘅，不過佢都話，好似自己咁，同時兼顧兩間NGO已經好忙，冇諗過要做上市公司董事，余雪奕仲話「好佩服啲女強人，唔知佢哋點分身做咁多職務」。