擁32D導彈胸嘅蔚雨芯（Rainky）一直以「魔鬼胸」聞名，今年只有22歲嘅佢，後生有身材個樣又唔差，喺娛樂圈發展都唔愁冇得撈，不過年紀輕輕嘅佢，似乎好明白夢想唔可以當飯食呢個道理，所以早兩年已經跟公司同事投資做生意，一於搵錢最實際。
忍口最辛苦
馮仁昭前兩日喺港澳碼頭入面嘅「華星冰室」見到蔚雨芯，當日大約中午12點幾，由於係午膳時間，食客多到坐滿個場，密冚「魔鬼胸」嘅Rainky嗰日先喺櫃面收銀，然後跟住一位店員四位騰，一時去水吧攞飲品俾客人，一時又負責捧餐，總之就忙到冇停手。
馮仁昭打過電話搵Rainky，講笑問佢係咪唔做藝人轉做樓面？佢就話：「梗係唔係啦，因為今次投資咗少少，所以想學吓點做生意，了解吓成個運作，我希望分店越開越多，第日可以上市吖嘛！」不過，Rainky話喺冰室做嘢要忍口都幾辛苦，因為好多嘢食引誘：「我啱啱接咗個收身代言呀，所以一定要忍口，因為要喼弗呀！」
撰文：馮仁昭