「比起倫奧拎銅牌嗰陣，我老咗四年，但對爭里約熱內盧奧運嘅信心冇變。」28歲香港女車神李慧詩（Sarah）噚日由倫敦帶咗世錦賽500米計時賽銀牌返港，一到埗就收到國際車聯（UCI）好消息；最新里奧最終排名，Sarah爭先賽排第一，凱林賽排第二，兩個比賽都殺入里奧，認真可喜可賀。
「1%爭牌機會都唔放棄」
UCI周二發出最新消息，計晒近兩季包括八站世界盃同兩次世錦賽成績，列出車手最新排名兼入選里奧場地單車嘅名單，香港除咗Sarah喺爭先賽同凱林賽入圍之外，梁峻榮同刁小娟亦攞到男、女全能嘅入場券。上星期喺世錦賽凱林賽同爭先賽無緣獎牌嘅Sarah話：「如果冇信心，連爭獎牌嘅機會都冇，正如教練（沈金康）講，就算只有百分之一爭獎牌嘅機會都唔可以放棄，更何況我唔止百分之一呢。距離里奧仲有五個幾月，咩都可以發生。」
Sarah總結今次世錦賽失利，係有好多因素，凱林賽首圈被連累炒車之後，自己喺當日餘下比賽都唔係好舒服，而爭先賽八強就喺上晝10點開賽，自己好似未瞓醒咁：「呢啲都唔係藉口，我會好好針對今次不足去改善。」
原本下月去里約熱內盧奧運場館參加測試賽，但因為當地場館工程未完工，行程或會更改，而Sarah仲話唔怕當地嘅寨卡病毒喎。對於香港出年四月會首次舉辦世界場地單車錦標賽，Sarah講明想幫香港喺500米計時賽贏到「彩虹戰衣」，同時希望香港政府可以藉世錦賽大力推廣單車，最好學界都有單車比賽咁話。