SOHO中國（410）董事長潘石屹與太太張欣已經有一段時間冇在港高調現身，噚日佢哋一齊主持公司業績會，一人負責答一題，分工合作，順便晒埋恩愛。以前市場不時傳佢兩公婆要離婚，睇表面應該唔係真嘅。
呢對夫妻檔有幾恩愛？睇張欣幾着緊幫潘石屹擋駕就知。事緣上月潘總嘅老友、有「任大炮」之稱嘅內地地產商任志強因批評「媒體姓黨」而俾網信辦查封咗佢擁有3,700萬粉絲嘅微博。
任大炮被禁聲，潘總亦封口。一提到任志強，佢就笑笑口，避而不答，華華再三追問，旁邊嘅張欣更大聲指令大家：「不准八卦！」華華出到怕俾老闆炒魷魚呢一招，張欣笑住回應話：「老闆要不炒了你，就把我們都炒了！」可見滅聲威力幾勁。
潘總封口亦有迹可尋，睇番佢微博，最後一次發文係2月25日，同以往日日發帖嘅習慣完全唔同囉。