香港桌球天后吳安儀噚日同李慧詩前後腳由倫敦返港，帶住伊甸桌球經典賽亞軍獎座嘅佢話攞唔到冠軍因為唔夠體能，由於四強對葉蘊妍同八強對溫家琪加埋打咗七、八個鐘，相反決賽對手伊雲絲就有多啲時間休息。安儀希望月底返英國打世界女子桌球錦標賽嗰陣會有更佳狀態爭衞冕喎。其實伊甸賽同世錦賽相距唔夠一個月，安儀都要趕返香港，係為咗出席今月21號嘅香港傑出運動員頒獎禮。安儀上年首奪世界冠軍成為「星中之星」大熱，佢話未諗到着咩衫出席，但以佢次次都悉心打扮，相信今次都唔會令觀眾失望。