環球經濟吹淡風，金融才俊保住個飯碗最要緊。華爾街嘅賓架舊年花紅大縮水，跌咗9%至14.62萬美元，平均每人落袋113萬港紙。
美國紐約州審計長的納波里噚日發表報告指，紐約市證券業從業員花紅池縮減至250億美元，按年大跌6%。華爾街嘅賓架花紅平均跌近一成，係近三年最少，主要因為紐交所企業嘅經紀與交易業務利潤大倒退。
當局話，花紅縮水，反映過去一年市況波動，充滿挑戰。當局估計，全球經濟繼續積弱，華爾街賓架搵食仍艱難。
老實講，金融海嘯後，全球監管機構收緊監管，令大行經營成本上漲，加上經濟環境一般，好多賓架都面對現實，知道冇辦法重返金融海嘯前咁好景㗎喇。