求驗客手記：
曼聯輸慣照睇Adele

就算輸波，飯都要照食，生活都要繼續，始終足球唔係生命嘅全部，尤其近幾季都輸慣波嘅曼聯球員，相信都已經學識點樣用平常心面對失利。禮拜一晚，英國樂壇天后Adele喺曼徹斯特開演唱會，上場對西布朗拎紅牌嘅桑馬達單拖出席，而朗尼就帶埋太太高蓮入場睇，而卡域克同舒尼達連都帶咗另一半。

雖然見到朗尼行得走得，但英國傳媒話呢位曼聯隊長仲未好番晒，應該踢唔到對利物浦嘅歐霸盃比賽。至於贊奴沙星期一都要開工，佢代表曼聯U21出戰曼徹斯特高級盃四強，梅開二度，幫球隊以4:0大勝奧咸。