剛被新特蘭炒魷嘅前英格蘭國腳翼鋒阿當莊臣（AJ）「衰十一」罪成，監就坐硬，仲可能要坐10年咁多，不過英格蘭足總、新特蘭同曼城就冇嚟醒目，仲未喺官網度鏟走關於佢嘅報道，當中仲有唔少係同小朋友有關，例如其中一條喺2011年3月6號出街嘅影片，就係佢以嘉賓身份，同五個着住曼城波衫波褲嘅小朋友，幫曼城位於阿布扎比嘅球會官方商店剪綵（圖）。消息話，相比因強姦一個19歲女仔而坐咗幾年監嘅卓雲伊雲斯，現年28歲嘅阿當莊臣更加乞人憎，希望英格蘭足總、新特蘭同曼城唔好後知後覺，嗱嗱聲出手搞番掂官網內關於阿當莊臣嘅報道啦！