呢幾年，中國男足同女足真係兩個極端，男足畀人有驚冇喜，「沒有最差，只有更差」；反而「鏗鏘玫瑰」爭氣，前日喺奧運外圍賽以1:0擊敗南韓，力壓日本同北韓，事隔一屆後打入今夏嘅里約熱內盧奧運。
喺外圍賽，中國女足要同澳洲、日本、南韓、北韓同越南踢單循環分組賽，爭兩個出線席位，之前國內外都冇乜人睇好佢哋，但呢班娘子軍先喺上月底贏越南2:0，再喺今月和北韓1:1同贏日本2:1，表現令人驚喜！禮拜一，佢哋硬撼南韓，靠「雙王」合作，由王霜助攻畀王珊珊頭槌頂入，以1:0擊敗南韓！由於同日澳洲以2:1贏咗北韓，澳、中兩國提早一輪鎖定頭兩名，出線里約奧運。澳洲𠵱家四戰全勝得12分，而中國就得10分，澳、中會喺今日交手踢最後一場，爭首名出線，兩隊都可能派副選上陣。
網民彈男足高薪低能
喺孫雯時代後，中國女足都沉淪咗一段時間，仲入唔到上屆倫敦奧運；今次事隔八年重返奧運賽場，新上任嘅法籍教練比尼居功至偉，唔少網民都讚佢勁過法國同鄉、前國足主帥佩連。比尼喺今次外圍賽唔用門將王飛，改用靚女趙麗娜去把關，都俾唔少人質疑，但𠵱家球迷都心服口服。趙麗娜亦好開心，見到外界話佢實力與美貌兼備，「呢種轉變係慢慢嚟嘅，我相信球迷仲可以見到我更好嘅一面。」國內網民普遍大讚女足勁，亦有唔少人藉女足去踩男足，有人話男足球員人工咁高，但表現差過班女將好多；網民希望中國足協提升女足國腳嘅待遇。
另外，日本喺外圍賽四戰得一勝一和兩負，成績令人失望，據報日本主帥佐佐木則夫會引咎辭職，日本足協亦希望嚟次大換血。