咪話特首梁振英唔理我哋呢班打工仔啦，啱啱佢就响網誌po文，話「將來，如果可以在IFC一帶，建個現代化的岸邊泳棚，午飯後游二十分鐘，是去gym 以外的好選擇。」中環的朋友有福了！雖然唔知幾時先有得游，但係而家政府啲嘢話上馬就上馬㗎嘛，執定游水袋就啱㗎啦，尤其是女仔，真係帶漏支眉筆都唔敢做運動，所以即刻就規劃下想响lunch time去游水要帶定咩裝備啦！
1. 游水袋：以容量夠大、可防水為佳。
2. 泳衣、泳帽、泳鏡：唔响池邊浸水、認真游水的泳客都要帶的三寶。
3. 卸妝水、洗面乳：中環返工要化妝，早上化好，游水前要卸妝洗面先落水，保持面部和池水清潔。
4. 防曬液：唔知IFC一帶呢個岸邊泳棚露唔露天，帶定防曬以免曬傷。
5. 毛巾、沐浴乳、洗頭水：游完水要沖涼，計少支護髮素啦已經！
6. 面霜、body lotion：游完水沖完涼一定要保濕，尤其面部，一定要打好底才好再化妝呀。
6. 化妝袋：BB Cushion（最簡化粉底）、液態胭脂、眉粉、眼形、眼線筆、睫毛液。
7. 梳：吹頭有梳快乾好多。
其實成袋計埋都唔算好重，化妝和沖涼用品可存放於公司，又如果，「現代化的岸邊泳棚」好似某啲健身室咁可以提供埋毛巾，咁就Perfect啦！
記者：容慧心