雖然禮拜日尼馬停賽返去巴西唞吓，但巴塞隆拿攻力冇減弱，作客4:0大破伊巴。蒙尼亞艾哈達迪開紀錄，美斯梅開二度，蘇亞雷斯埋齋嗰球就最精采，喺禁區入面通埋對手坑渠先射入。半場嗰陣有段小插曲，有位嚟自美國嘅伊巴球迷落咗草地同女友求婚，喺全場觀眾見證下抱得美人歸。巴塞呢場大勝4:0，以72分繼續排榜首，領先次席馬德里體育會八分。馬體會周日3:1作客贏咗華倫西亞，費蘭度托利斯第300次為馬體會披甲，射入一球。