喺新界東立法會補選落敗嘅「體雕大狀」梁思豪（圖）原來噚日去咗廉署舉報黃永喺節目中散播失實言論，錯誤指控佢抄另一敗選人、新思維黃成智條橋，即如果唔投佢可以投民建聯周浩鼎，質疑咁樣會令佢隨時觸犯選舉法例，要同阿鼎分擔一半選舉支出。
話選民棄自己保周浩鼎
體雕大狀批評黃永自命「公義第一」卻名不副實，因此要投訴，直指「我先係公義正宗」。體雕大狀認為阿鼎落敗係好事，因為阿鼎當選社會只會更撕裂，個人認為唔少人因為「棄保」先投鼎而唔撐佢；對於低票落敗，係有啲唔開心，但「陣痛七日已完成」，心情已經回復。
佢笑指今次參選令更多人明白乜係體雕，正積極考慮9月再戰，指9月無棄保效應，3萬、4萬票或已有一席，自己唔係冇機會，料屆時更多市民會明白佢嘅溫和反拉布立場。八方問過黃永，佢話多謝有人關注佢嘅網台節目，指任何人都有自由投訴，會睇睇廉署對今次案件是否受理，有需要一定盡量配合。