香港有本土派，如哪咤鬧東海，搞到政壇亂亂哋；本土派在新界東補選，居然攞到六萬幾票，佔總票數15%，當堂嚇驚埋泛民激進派，梁國雄、陳志全、范國威三人，在9月4日立法會選舉，是但一位隨時會下馬。
本土派講香港本土主義，排斥大陸客、拒絕兩地經濟共融，呢類政策，事實上不可行，無謂多花時間辯論。但在美國，確係有條件閂埋門搞自給自足，向外徵收好高好高嘅貨物入口稅嘅，講大美國主義，未必不可行，於是有大量知識較低、收入較少，平時不窮不富，少拿政府津貼之白種人支持，公然排斥移民，侮辱女性，唱衰他國，向伊斯蘭教惡言相向，對中國（外貿）、墨西哥（合法或非法移民）大肆抨擊。呢啲平時講唔出口嘅說話，特朗普當係唱歌，一一盡訴心中情，於是平時捱到死死吓，覺得自己平時俾女上司恰，被少數族裔搶走工作機會嘅白種藍領工人，大量支持特朗普，令佢聲威大振，極有希望成為共和黨之總統候選人，決戰希拉莉。
其實特朗普算係美國本土派，表徵與實質，與香港本土派並無太大不同，皆是用出位言辭，挑起普羅人民嘅仇外情緒來搶選票嘅。一個身無長物梁天琦已可令香港本土派冒出頭來，特朗普本人財厚勢大，富於營商經驗，好嘅壞嘅乜都見過，由佢提出保護主義排外嘅理論與政策，威力當然大過梁天琦幾百倍。
美國共和黨當初以為選民會趕走呢位帶有種族歧視、性別歧視嘅狂人，會被選民唾棄，不足為懼。點知特朗普竟然大受歡迎，共和黨內之建制派溫和派為之面青，驚惶失措，唯有由上任總統候選人羅姆尼首先發炮，惠普女總裁隨後猛烈攻擊特朗普「總統」係大騙子，假如真的當選會害死美國。前候選人猛烈攻擊現任排名第一嘅準候選人，未免係過咗火位，置禮貌與傳統不顧，對美國國際形象好有破壞性。但事到緊急關頭，共和黨內建制派顧不得黨內發生內戰之可能性囉，重量級人物輪流上陣痛批特朗普，但是否太遲呢？還與特朗普爭做總統候選人嘅還有羅比奧、告魯士與卡西奇三人，在辯論會上圍攻特朗普，吵鬧得精彩，特朗普竟然提及不文之物，觀眾為之嘩然，假如特朗普真係成為候選人，希拉莉有排煩，我地花生友還有大把戲睇。