雖則𠵱家嘅《南華早報》（South China Morning Post）同回歸前嘅路線格調好唔同，但有個傳統保留至今，就係精心挑選Student of the Year。有「AO歌王」之稱嘅民政事務局前常任秘書長楊立門Raymond當年原來都攞過呢個榮譽，仲上埋報紙㗎！
Raymond有3個家姐，佢話自細都好斯文，爸爸唔係虎爸、非常liberal，當年用左手寫字都冇鬧。
中六膺Student of the Year
以為Raymond只like音樂？查實佢都愛以書為伴，小時除咗中國名著如《西遊記》、《三國演義》等，旅遊甚至健康保健書都唔放過。
Raymond聲稱讀書唔太勤力，但成績算中上。中學時期夾band度日，不時獲邀到其他學校出騷。最記得有次要去灣仔某女校表演，點知演出前兩日狂咳，「一度諗住唔去㗎嘞」，最終頂硬上，「雖然在場人士都話ok，但我覺得麻麻！」（少男喺女生前，梗係想表現最佳一面嘅！）
原來佢1978年讀中六時勇奪《南華早報》嘅Student of the Year榮譽，當時評分除咗計校內成績，仲計其他表現，而佢當時喺校際嘅音樂節、作文同繙繹比賽都攞獎，難怪脫穎而出。
雖則鍾意唱歌，但佢1982年大學畢業後揀咗鐵飯碗，90年代初擔任過荃灣政務專員，試過陪前港督肥彭落區！
