馮睎乾濕夢做不成做了個如假包換的乾夢，醒來立馬替遭扣上本土派帽子的屈原老前輩平反，順手清洗愛國詩人被殉情的謠言，「前排大陸已經有班粉腸屈我搞基，話我畀楚懷王條昏君飛咗，於是為情自殺」，推翻糭子繆斯在皇上駕崩十八年後才慢吞吞寧為玉碎的傳聞。同一天娛樂版頭條「50歲陳慧嫻想拗直攣男」，其實也是屈得就屈，假若你像擔心基王國人口越來越疏薄的我一樣，圓睜杏眼地氈搜索內文，便會發現久休復出的傻女並沒有打算挑戰自己的臂力，只說近日撞到的心儀男原來好嗰味，「估唔到10年冇開齋，一開齋就遇到個mission impossible」，拗直野心完全欠奉，可惜無人為標題黨的譁眾取寵撥亂反正，累陳小姐揹上企圖破壞同志圈自然生態的虛名。
不過，我最肉緊的，是她對那位理想夢中情人的形容：「佢嘅類型就係我12歲時鍾意嗰種，陽光男孩好貴氣，好似陳百強嘅公子哥兒，又有才華。」喂喂，閣下心知肚明是一回事，人家丹尼仔可沒有實牙實齒公開過性身份，因住衣櫃守衛員鬧鬼你侵犯人權呀！這方面，我最服的是語言藝術家甘生，兩星期前他在周刊那篇《愛的教育》，妙筆一揮將花利格蘭加、塔亨達、尚馬利、安東尼柏堅斯、狄保嘉第和洛克遜這批屢屢基袍加身的歐美男星，歸類為「貌美如花神高神大」，體貼地既保護了蠻粉的脆弱心靈，又道出了血淋淋的真相，姿態之優雅用心之良苦無人能出其右。我忽然記起陳笑風的《山伯臨終》，下場前有句詩白：「寄語後世人，珍重看蝴蝶」，各位讀者共勉之。