令到日本熊本縣吉祥物「熊本熊」喺香港大紅大紫，一田百貨行政總裁（CEO）莊偉忠一定有份做推手，最近富邦香港同一田合作推海外首張熊本熊信用卡，可惜張卡啱啱推，莊偉忠就話唔撈，就連富邦香港消費金融部主管谷祖明（Stanley）都話感到意外。
Stanley話，由於佢哋一直跟一田有合作，佢平日經常見到莊偉忠，已經不下一次聽佢講話要辭職，次次都以為佢講笑，直到早前，睇新聞先知莊偉忠原來玩認真，所以有少少surprise咁話。
不過識咗咁耐，Stanley相信，以莊偉忠嘅才能，大把機會可以發展，尤其記得每年一田優惠日，都見莊偉忠叫晒所有同事落場，自己又拉高衫袖搬貨，真係冇得頂。