周日舉行嘅NBA常規賽，爆出史上最大冷門！由拜恩（Kobe Bryant）領軍、賽前得勝率僅為19%嘅湖人，喺主場以112:95擊敗賽前得勝率高達91.7%嘅一哥勇士，令後者慘吞今季第六敗，戰績變成55勝6負。
全隊穿24號波襪敬拜恩
據ESPN數據顯示，兩隊賽前得勝率相差72.7%，湖人今場贏波亦成為NBA史上最大冷門。今場攻入12分嘅拜恩表示：「球隊今場表現好好，贏波對一班年輕球員嚟講亦好重要，因為佢哋可以變得更加有自信。」紫金軍團為咗表揚呢位即將退役嘅球星，全隊喺今場着上印住24號嘅特別版波襪，亦係NBA史上首次有球隊着上裝備去向一位現役球員致敬，拜思喺賽後亦講笑話：「我哋贏波，一定係對波襪帶嚟嘅神奇力量。」
勇士「浪花兄弟」引以為傲嘅三分波，喺今場齊齊失準，「咖喱仔」史堤芬居里（Stephen Curry）10射僅一中，K湯遜（Klay Thompson）更加係八射全失，而全隊嘅三分波命中率錄得今季新低13.3%。教練卡爾（Steve Kerr）表示：「當球隊手風唔順嗰陣，要更落力防守先有機會贏，但係好可惜我哋今場做唔到，所以輸波係正常嘅。」咁啱95/96球季嘅公牛，喺第61場常規賽亦輸畀紐約人大大鑊，唔通要70勝就要咁？
至於職業生涯中，最後一次同勇士交手嘅拜恩，賽後就送咗件波衫畀K湯遜，希望可以鼓勵吓呢位後輩；波衫上面仲寫住：「Klay，好榮幸可以睇住你一路成長，繼續努力！」