35歲嘅華置（127）非執行主席劉鳴煒，噚日忽然喺facebook上載一張佢又老又皺皮嘅相，望見都嚇一跳，佢明明係個靚package，做乜忽然整個皺皮look見人，唔通想測試港女們嘅反應？
實情佢係想叫大家關注長者同退休問題。佢早前搵咗廿幾位青年參加「長者貧窮戶外體驗」活動，包括穿上十幾磅嘅高齡體驗衣，撐住拐杖行路，仲要執紙皮，劉鳴煒希望透過活動，令年輕人對長者有更多同理心，從而思考如何改善社區。
坊間一直盛傳劉鳴煒有心從政，甚至選特首，姑勿論佢適唔適合，佢身兼青年事務委員會主席，做多啲工作等後生仔女知道民間疾苦都係好事，希望佢都可以因此變得更加貼地喇，單靠一個靚package並唔可以得到民心㗎！