【本報訊】亞洲兩性看似越來越平等，台灣、韓國還出了女總統，香港各黨派也由女人「擔大旗」。不過，部份銀行、服裝店、餐廳卻規定女職員上班須化妝、穿套裙及高跟鞋。趁三八婦女節，《蘋果》找來3位男士體驗女士生活重要一環──化妝，感受當中苦與樂；又邀資深空姐暢談女性職場困難處。
記者：袁楚雙
化妝師Shirley將化妝掃、睫毛夾等工具及化妝品攤在長桌上：「可以做番啲輪廓修飾……Blending（指粉底顏色均勻）會做得好啲……」立法會議員范國威取起一支化妝掃笑稱認得它，惟學民思潮前成員黎汶洛顯得手足無措：「係咪當水彩咁畫就得？」議員梁國雄更直說：「未見過呢啲嘢。」
他們說，平日出門前梳洗最快10至20分鐘。平日見女伴化妝，三扒兩撥看似簡單，但3個男人要自己掃粉底、塗胭脂眼影唇膏、畫眉眼線，才知筆筆皆辛苦。范國威幾經辛苦完成最困難的眼妝部份：「我諗女性喺化妝方面好畀心機，真係要好專注！」長毛更無從入手：「我可唔可以轉做評判呀？」終由化妝師代勞。范國威認為，做男士是幸福的，至少不必化妝。黎汶洛說「化妝係一樣好嘥時間嘅嘢」。
女職員化妝是要取悅（男）顧客？范贊同化妝對大眾審美觀有影響，「某程度係令女性形象有所定型」。男士都會被取悅？黎汶洛卻認為「做番自己係最好」。長毛更直言不喜歡女性化妝：「女人化妝第一吓係會覺得好吸引，但只係一個外化形象，一傾偈嗰種美學（感覺）冇晒啦！」坊間也有不少兩性體驗活動，如上海邀已婚男士戴胸圍裝餵奶工具感受餵母乳，范國威坦言也想一試，感受太太經歷。
空姐制服儀容要求多
空勤人員總工會總幹事吳敏兒透露，航空公司有儀容顧問檢閱空姐妝容，部份要求須塗指甲油，「就算唔係紅色，都要髹層透明，唔可以唔髹」。她憶述，多年前日航要求更極端，「要求（空姐）離遠幾多呎，都要睇到塊面有幾多隻顏色」。
她說，歐洲的航空公司着重航空安全多於「凸顯女性條腰夠幼」，「亞洲嘅航空公司，制服要凸顯女性體態，要好窄或好貼身，對真正使用者構成好多不便」。如有本港航空公司的衣衫很短，舉手容易扯起上衣露出腰部，她又引述報道指，早前有台灣航空公司的制服設計師指，空姐制服就是要讓人有遐想，令從業員甚為反感。