好事不出門，醜事傳千里。無綫去年選出十優港姐麥明詩（Louisa）省靚招牌，早前𦧲掂對方簽約後，即安排Louisa遠赴英國拍攝旅遊特輯，並重點到其母校劍橋大學拍攝。可是，昨晚凌晨劍橋學生報《The Tab》指出現疑似「白撞」𤓓爆事件。事緣當地時間上周六（5日）劍橋舉辦一年一度的春季舞會，Louisa和攝製隊當日進入舞會場地拍攝，起初所有人都相安無事相處融洽，學生會主席更主動在鏡頭前和Louisa攀談。
林作：《The Tab》零公信力
可是愉快氣氛突然急轉直下，該報道指舞會期間傳出Louisa並非真正港姐，而是騙子的消息。不過最爆的是，報道指「有人」在舞會中「呃飲呃食」，Louisa和攝製隊連人帶cam被「的」入辦公室，最後在場保安要求一眾人等從側門離開。
本報記者昨日致電Louisa男友林作了解，他坦言事件發生後，Louisa曾致電給他。林作在電話訪問中替女友不值外，亦鬧爆當晚的學生會主席：「嗰份報紙（《The Tab》）係學生報，講真係零公信力。而以我所知，Louisa佢哋去之前已經send咗email攞晒permit。如果佢哋真係白撞，點會喺入面拍咗一個鐘先畀人趕？Louisa有同我講過，嗰個學生會主席以為攝製隊係嚟影佢，又以為Louisa係記者去採訪佢，點估到佢哋咁受歡迎？我諗佢覺得Louisa嗰晚搶咗佢風頭，所以佢哋拍拍吓，就搵個理由趕走佢哋。成件事Louisa冇錯，只係嗰個學生會主席太低能、太心胸狹窄。」
無綫：和諧氣氛下離開
問林作有否戥女友心痛，他說：「冇乜所謂，咪當係幫個節目宣傳囉！」而無綫企業傳訊部副總監曾醒明接受傳媒訪問時亦說：「攝製隊一星期前已獲對方批准進行拍攝，所有人員都有手帶做識認！不過之後佢哋話有攝製隊喺度令學生好拘謹，要求終止拍攝，攝製隊喺和諧氣氛下離開會場。」
採訪：王梓嫚
