啱啱打完呢輪英超出現唔少紅牌，其中阿仙奴同利物浦打少個之後都唔使輸，唔通曼聯嘅桑馬達都係咁諗？周日曼聯作客西布朗，馬達踢到26分鐘已經領第二面黃牌被逐，不過紅魔最後一分都攞唔到輸0:1，爭前四大受打擊。領隊雲高爾賽後都話佢位愛將「士刁拔」，蠢仔呀。
三分鐘連搞費查兩鑊
曼聯賽前勢頭唔錯，由上月英足盃贏梳士貝利起，10日內連贏四場；但周日英超作客近況都唔差嘅西布朗，就發覺唔多易踢。一直以嚟都受到雲高爾重用嘅桑馬達，今場波唔知因乜上晒腦，先喺23分鐘阻住費查開罰球領第一面黃牌，唔夠三分鐘後又搞費查，喺對手後場冇乜威脅下踢跌佢，球證甸恩企咁近，即時畀多面黃牌趕佢出場。西布朗喺66分鐘由前鋒荷西朗頓打破僵局建功，以1:0擊敗曼聯。
領隊雲高爾賽後講到呢兩面黃牌都好谷氣：「佢拎第一面黃牌堅係蠢，明知阻對手開波黃梗。有黃牌在身就要『醒扒』啲，被逐離場真係累成隊，要10打11成個鐘唔輸就奇。不過，其實球證應該網開一面，佢（甸恩）應該知道馬達唔係粗野球員，賽後我問佢之前拎過幾多面紅牌，一如所料係一張都冇。」
上周英超領紅隊好勁
上輪英超一共出現五面紅牌，其中阿仙奴喺高基連被逐下領先變落後，但最後都追得返逼和熱刺2:2。利物浦仲醒，落後0:1之後有占士米拿唔生性亂鏟對手兩黃一紅，但佢哋踢少個先識入波，連入兩球以2:1反勝水晶宮，雖然賓迪基喺補時博到嘅12碼有插水之嫌；連修咸頓都喺10人應戰下1:1逼和新特蘭。不過，曼聯就冇咁好彩，輸畀西布朗之後繼續排第六，落後第四位曼城三分兼多踢一場之餘，亦俾後面踢少場嘅利物浦追剩三分距離，莫講話爭歐聯參賽席位難，下季可能連歐霸盃都冇份踢。
