身為政協委員嘅港大校務委員會主席阿瑟王李國章，目前身在北京開會，佢接受傳媒訪問時，除咗繼續連番爆金句，同時再次發炮鬧港大學生會前會長馮敬恩「失禮」大學生。捱轟嘅馮敬恩喺facebook留言，但唔係還擊喎，而係繼續大膽「爆料」，揭李國章鮮為人知嘅一面，就係阿瑟王隻手指，原來係有多用途功能㗎！
馮：喝得津津有味
到底有乜咁巴閉？八方真係好緊張，唔通係可以點石成金？咁可唔可以點走佢自己嘅眼中釘？馮敬恩親自揭謎底，佢喺fb話呀，每次校委開會，都會見到成70歲人嘅李國章，「還會喝可樂，用手指『了下了下』（撩下撩下）杯中的冰塊，喝得津津有味！」哦，原來佢隻手指可以變成stirrer，用嚟攪嘢，既方便又快捷。
對於李國章手指嘅「特殊技能」，網民睇見都議論紛紛，有人話佢本身都好鍾意撩嘢攪嘢，否則點會搞到港大咁多風波，所以隻手指鍾意撩嘢都唔特別。但當然好多人就話佢，點解咁唔衞生㗎？有人搭嘴話，上一代嘅人，成日以手指做特別嘢，包括數銀紙時要點一點口水！馮敬恩更厲害，佢從中參透到一個道理：「我們很快就等到。」佢呼籲年輕人唔好放棄自己，好好裝備自己喎！唔知佢又會唔會裝備好早前被懷疑係竊聽器嘅保溫瓶，入去錄低呢次爆料嘅證據呢？
李八方
mailto:[email protected]