「股壇開心果」藺常念（藺sir）上月底啱啱過68歲生日，雖然年紀唔細，但佢好有精力做慈善，噚日朝早竟然走去玩「博愛單車百萬行」，不過佢今次太高估自己，「爭啲要叫救護車」咁話。
單車百萬行嘅參加者喺青衣報到後，由青沙公路起步，經南灣隧道折返，上昂船洲大橋後再回頭，全程13公里。
藺sir話，今次參加除咗做善事，亦貪佢可以喺大橋上踩單車，夠過癮，點知因為上斜路太辛苦，踩到一半已經嗌晒救命，最終勉強用咗個幾鐘頭完成，去到終點「都死咗一半嘞」。
結果藺sir噚日成個下晝，都因腳背痛而瞓床休息。佢話，只係太累冇乜大礙，叫大家唔使擔心，而講到對上一次踩咁耐單車，竟然係佢喺美國讀書時期，即係40年前嘅事，講完佢都哈哈大笑。