因傷缺陣11場嘅占美畢拿（Jimmy Butler）終於歸隊喇！呢位公牛後衞喺上周六嘅NBA常規賽復出，帶領球隊以108:100主場擊敗火箭，一止四連敗頹勢，仲令公牛爭取季後賽席位嘅希望變得更大。
攞「雙雙」主場拆火箭
畢拿喺上月初扭傷右膝，差唔多唞咗成個月，但係佢久休復出一樣咁勁，攞到「雙雙」24分同11籃板，帶領公牛擊敗火箭。雖然打得咁好，但畢拿喺賽後就話自己仲未回復到最佳狀態喎，不過都充滿自信咁話從未諗過今場會輸。
至於公牛另一贏波功臣、同樣貢獻出「雙雙」28分同17籃板嘅加素（Pau Gasol）就大讚畢拿：「佢無論攻守都好出色，尤其係不惜氣力咁防守嗰陣，總可以帶動全隊人，令我哋表現得更好。」今場拎到17分嘅戴歷路斯（Derrick Rose）都話畢拿對公牛好重要：「當我哋同時上場嘅時候，總會吸引敵軍嘅防守，咁就可以令其他隊友打得更輕鬆。」不過呢位控衞都承認，假如想打入季後賽，未來21場常規賽場場都好重要；𠵱家戰績31勝30負嘅公牛，暫時壓過喺同日另一場以89:102作客輸畀紐約人、拎到31勝31負嘅活塞，升上東岸第八位。
雖然火箭嘅當家球星夏登（James Harden）攻入全場最高36分，不過佢班隊友全部表現麻麻，所以都難阻球隊落敗；而啱啱由CBA山東金星轉投火箭嘅前榜眼比士利（Michael Beasley），似乎就仲未適應番NBA嘅節奏，今場上陣四分鐘只係拎到兩分。