昨天吃自助餐，有點消化不良，晚上做了個怪夢。夢中我在廟街，見李兆基（不是四叔）手握西瓜刀怒氣沖沖的走過來。他先炒蝦拆蟹一輪：「你班蛋散又屈我！我係屈氏啫，唔代表我鍾意屈人或俾人屈！」
我滴汗問：「基哥，你冇嘢呀？」
基哥說：「我基你個死人頭！前排大陸已經有班粉腸屈我搞基，話我俾楚懷王條昏君飛咗，於是為情自殺。大佬呀讀吓書啦你哋──我自殺嗰屎，懷王已經死Q咗十八年啦，仲殉乜春情先？楊過小龍女呀？俾我抑鬱症死得唔得？」
我恍然大悟：「你唔係基哥，莫非係──」
「冇錯，」基哥突然淚汪汪仰望長空，吟了兩句詩：「靈均枉自傷心死，卻與閒人作令辰。講嘅就係我！」我不解：「你都係講番中文啦基哥。」
基哥即咆哮：「都叫你班廢柴讀吓書㗎啦！句詩係話：我本來好傷心咁去投江死，點知俾你班粉腸當假期！唔好講呢啲啦。今日搵你，係張愛玲小姐介紹，佢話你有個專欄，可以幫我講幾句。前幾日我嗰個已經融入家中嘅女傭同我報料，話香港有個曾鈺成寫我，最後幾句係咁：『後世對屈原給予十分崇高的評價，稱他為愛國詩人，甚至認為他是中國歷史上第一位愛國詩人。不過，屈原所愛的，只是楚國；當時尚有周天子，楚國只是周朝之下的一個諸侯國。用今天的說法，屈原其實是個本土派。』」
我聽他背誦如流，不禁讚嘆：「基哥你咁好記性，係咪成日跑步呢？」
基哥說：「記性嘅嘢，我早就響晒朵㗎啦，司馬遷話我『博聞彊志』，好心你咪大驚小怪啦。言歸正傳，我有兩個point，你同我記低佢，禮拜日出篇文寫番出嚟。第一，你哋個共產國無啦啦封我咩第一愛國詩人，搞到我個朵cheap晒，喂，都話咗我博聞彊志㗎啦，我梗知道今時今日『愛國』笨唔係咩好嘢，話我愛國都算啦，仲要『第一』？你顧唔顧我感受㗎？嗱，『國』嚟講呢係有兩種：第一種係你哋共產國日日掛喺嘴唇邊嗰個『國家』，我個年代唔叫『國家』，叫『天下』，而天下係由列國組成嘅；至於你哋而家所謂『中國』，我哋當時就叫『諸夏』，明未？第二種『國』，即係我楚國個國，秦國個國，同你哋而家一個省差唔多。橫掂都係，唔怕講埋：我個年代，『家』亦唔等於家庭個家，而係國內卿大夫嘅封邑。孟子話『千乘之國，弒其君者，必百乘之家』，個『家』就係講封邑，okay？所以我當年愛國，同共產國班盲毛講嘅愛國，根本九唔搭八，唔該咪再老屈。第二個point，嗱，你哋講『本土』，小弟就主張『縱則楚王』，即係話只要楚國同齊、燕、趙合縱抗秦，咁楚就可以一統天下。咁算唔算本土派呢？我嗰時有句潮語：『內其國而外諸夏，內諸夏而外夷狄』，意思係以我自己個國為先，然後諸夏，最後夷狄，咁咪掂過碌蔗囉。我作為一個官，就梗係以自己個國為先啦，呢啲常識嚟㗎喎，仲駛咩叫『本土派』呀？如果以另一個國為先，好似我嗰幾件仇家靳尚、子蘭，走去親秦，等於你哋香港人所謂投共，呢啲咪叫『內奸』囉，明唔明呀？話時話，我嗰個已經融入家中嘅女傭同我講，曾鈺成係秦國──」
此時我突然醒來，因為要去廁所。是夜基哥沒再回來。為免他在夢中斬我，只好如實把他的話寫出來。