噚日有兩場日聯上演入球騷，加埋有成17個入球咁多，先係川崎前鋒（上圖）主場逼和湘南比馬4:4，之後神戶勝利船（下圖）就喺落後2:3下反勝來訪嘅新潟天鵝6:3。前鋒嗰場好癲吓，半場已開個600倍嘅[半和]3:3波膽，最後主隊靠森本貴幸補時一分鐘入波逼和比馬4:4，再爆多個300倍「和其他」波膽出嚟。
至於勝利船嗰場仲誇張，佢哋由石津大介同相馬崇人建功而一度領先2:0，但天鵝靠拿費爾達施華入兩球喺60分鐘反超前3:2；但勝利船隨即撳掣，18分鐘內連入四球，包括柏度祖尼亞梅開二度，戲劇性反勝作客嘅天鵝6:3，爆個60倍「主其他」波膽。