眾所周知，巴西騎師雷神莫雷拉鍾情足球運動，除了搵食需要必須騎馬比拼外，他最經常做的運動，便是去球場踢波，以及入場做觀眾睇球賽，相信不少香港球迷，都曾在足球場內遇見過雷神，而早前英國騎師莫雅來港客串，亦不時與雷神相約一起切磋球技。
其實除了騎師，不少馬主亦有心有力，踢埋一份，好似「劍斷浪」馬主許坤華便是其一，佢同雷神兩個於日前同其他友人組成一隊，參加一項友誼賽，結果成功勝出捧盃。當日許坤華的未婚妻葉思貝都有到場打氣。
雷神同許坤華都係鬥志十足嘅人，佢哋周日第五場三班1200米草地合作嘅「劍斷浪」，亦係好有鬥心嘅馬，上仗服役初出爭直路賽，撞正雷神養傷冇得騎，由柏寶操刀，隻馬末段突圍之後，仍自動奮力衝刺冇揸流攤，越贏越遠彈甩亞軍「炸魚薯條」三個半身位，認真厲害。今仗雷神攞番嚟騎，當然唔會手軟。
睇番蔡約翰馬房嘅「紅衣醒神」，一出即勝後，再出成功連捷，「劍斷浪」隨時照辦煮碗，再下一城。