睇過嘅波咁多，邊隊贏邊個入我有時唔記得，但旁邊主持同插口嘅名嘴反而好有印象。香港以前播波有個好特別嘅做法，就係為咗照顧唔同層面粉絲，加入好多娛樂元素，譬如搵唔同界別嘅名嘴做埋一份。
明星足球隊志偉、阿叻、陳譚固然經典，其實亞視嘅尹佬、霑叔、何B、毓民亦好正斗，不過當我係觀眾角度時，賣飛佛係94年嘅《許冠文陪你等睇波》，因為佢集集都有女嘉賓，唔使麻甩味咁重，張艾嘉、小鳳姐上過去，張曼玉、鍾楚紅好似都有㗎，幾與別不同。到自己入咗行之後，又見識過好多名嘴參與足球節目，第一個就係盧David。話說當時有線啱啱第一次有足總盃播，賽前遊戲節目就係由盧嗲域主持，啲嘉賓最易玩嘅一個環節，應該就係估佢嘅足球食字gag，扭家嫂呀食碗翅呀呢啲食字gag。永遠懷念你。
2000年，歐洲國家盃有吳鎮宇，咁多年來佢好似同運動都冇咩關係，除咗嗰一個月，佢熟唔熟波唔重要，但起碼扮到似層層，每集用Sam哥個tone扮cool做主持。02世界盃食住日韓潮，參與名嘴眾多，達明日日扮速龍，而肥谷喺《少林足球》入面個句「唔好咁啦你哋，我想踢波呀！」其實幾啱當年嘅中國隊。04 Euro到阿葛嘞，佢守龍有返咁上下，足球sense OK㗎，之不過每日佢搞嘅gag就去到好遠嘅，其中一個環節係佢同李燦琛扮超人打怪獸，為乜要打呢就真係唔記得，同嗰一年希臘最後攞冠軍一樣咁耐人尋味。06世界盃德國舉行，呢一屆杜汶澤（圖）上陣，佢一時扮勁馬勒當拿上身講道理，一時又做矮仔同堅哥報新聞，好戲過當時仲好鍾意插水嘅C朗。再之後呢幾年嘅體育節目呢，名嘴好似少咗，反而足球BB就多咗，各有所好啦。
KEYMAN
節目主持